Tuesday, December 30, 2008

വയനാട്ടിന്നൊരു പ്രണാമം

അന്നൊരു സയാഹ്നത്തില്‍ സഞ്ചാരം തുടങ്ങവേ
എത്തിനേനൊരുകുന്നിന്‍ ശൃംഗത്തിലേകാകിയായ്‌.
വീശിടും കുളിര്‍കാറ്റില്‍ കാപ്പിയും മുളകുമല്ലേ
ലത്തിന്‍ ഗന്ധം പോലുമാസ്വദിച്ചീടാം, പക്ഷേ
വേര്‍തിരിച്ചറിഞ്ഞീടാം മാനവശരീരത്തിന്‍
സ്വേദങ്ങള്‍ ചുറ്റുംചേര്‍ന്നു വായുവില്‍ കലര്‍ന്നതായ്‌.
കാടിനേ നാടായ്ത്തീര്‍ത്തതെത്ര കൈകളാലാണോ
അത്രയും കരങ്ങളേ കാണൂന്നേനദൃശ്യമായ്‌.
സൂചിപോല്‍ കുത്തിക്കേറും ശൈത്യവും കഠിനമാം
ജ്വരവും സഹിച്ചുകൊണ്ടെത്രപേര്‍ പ്രയത്നിച്ചൂ.
മര്‍ദ്ദനം ലഭിച്ചീടുംകൂലിയായ്‌ പലപ്പോഴും
തുഛമാം കടലാസുകഷ്ണങ്ങള്‍ ചിലപ്പോഴും.
അവരെ സ്മരിക്കുന്നൂ ഞാനുമീമുഹൂര്‍ത്തത്തില്‍
‍മണ്ണിനെ പൊന്നായ്ത്തീര്‍ത്ത പൂജ്യരാം യുവാക്കളേ
ഈ മണ്ണില്‍ത്തന്നെയല്ലോ കേരളമാതാവിന്റെ
വീരനാം പഴശിയും ജീവിതം സമര്‍പ്പിച്ചു.
ആ വീരയുവാവിന്റെ ഭൌതികം കലര്‍ന്നുള്ള
വയലിന്‍ നാടേ നിന്നിലര്‍പ്പിപ്പൂ പ്രണാമങ്ങള്‍
[കോളേരി യു.പി.സ്കൂള്‍.സോവനീരില്‍ 1976-ല്‍ ‍പ്രസിദ്ധീരിച്ചു]

No comments: