Thursday, January 1, 2009

വെട്ടത്തുനാട്

കേരളമാതാവിന്റെ മാറിലായ്‌ വിരാജിക്കും
വെട്ടത്തുനാടേ നിന്നെയേതൊരുകാലത്താരും-
വിസ്മൃതപന്ഥാവിലായ്‌ ത്തീര്‍ക്കുവാന്‍ കഴിയാതെ,
നിസ്തുല പ്രതിഭയായ്‌ എന്നുമേ വിലങ്ങുന്നു.
പേരാറിന്‍സ്പര്‍ശ്ശത്താലെ പൂജ്യയായ്തീര്‍ക്കപ്പെട്ട-
വീരരിന്‍ മാതൃത്വത്താല്‍ ധന്യയായ്ത്തീര്‍ന്നോളല്ലേ!
ഭാഷതന്‍ പിതാവായ തുഞ്ചനും കിളിക്കൊഞ്ചല്‍-
ഭാഷയാല്‍പുരാണാദികാവ്യങ്ങള്‍നേടിത്തന്നു.
വ്യാസനും വാല്‍മീകിയും തീര്‍ത്തൊരാപ്പുരാണങ്ങള്‍
‍ഭാഷയായ്‌ കിളിക്കൊഞ്ചല്‍ രൂപത്തില്‍ ദാനംചെയ്ത-
ഭാഷതന്‍ പിതാവാകും തുഞ്ചനും ജന്മം നല്‍കി-
ഭൂഷിതയായിത്തീര്‍ന്നവെട്ടത്തുനാടെവെല്‍ക!
കൂരിരുട്ടിലായ്പ്പെട്ട കേരളമാതാവിന്നാ-
യിരുള്‍നീക്കിയീവെട്ടം വെട്ടത്തെ കാണിച്ചതും.
കാലത്തിന്‍ മറശ്ശീല നീക്കിനോക്കവേകണ്ടേന്‍
‍പാലൊളിപ്രഭ ചേര്‍ന്ന വെട്ടത്തു നാടിന്‍ മേന്മ.
ഭക്തനാം മേല്‍പ്പത്തൂരിന്‍ തൂലിക നിര്‍മ്മിച്ചുള്ള-
ഭക്തിതന്‍ ഭണ്ടാഗാരഗ്രന്ഥങ്ങള്‍ വാങ്ങിച്ചോളേ!
ചാവേരിന്‍ നിണംകൊണ്ടു സിന്ദൂരഫാലം തീര്‍ത്ത-
മാമാങ്കാഘോഷങ്ങളല്‍ പുണ്യയായ്‌ വിരാജിച്ചോ-
രത്തിരുന്നാവായയും വള്ളത്തോള്‍ ജനിച്ചുള്ളാ-
മംഗലഗ്രാമം പോലും നിന്നിലായ്കാണുമ്പോഴേ
ഭക്തിയും സാഹിത്യവും കലയുംക്ഷാത്രത്തിന്റെ
ശക്തിയും കലര്‍ന്നുള്ള നാടുവേറില്ലാ പാര്‍ത്താല്‍.

3 comments:

sreeNu Guy said...

സ്നേഹം നിറഞ്ഞ പുതുവത്സരാശംസകള്‍

മാറുന്ന മലയാളി said...

പുതുവര്‍ഷാശംസകള്‍

എസ്‌ എന്‍ പയ്യൂര്‍ said...

പുതുവത്സരാശംസകള്‍